Aysel Nəsirzadə - Hələ çox var gülməyə
TDKŞB · 07.08.2026

Bütün şəkil çəkənlər “gül” deyir,
gülümsəyirəm -
dodağımdan kölgəli bir təbəssüm,
gözlərimdən isə yorğun kədər boylanır.

Səni görsəydilər…
gözəlliyimin də, gülüşümün də itən izini
tapardılar.

Əksində dondu
ömrümün ən dəlisov günləri.
Ən gənc illərim
qara saçlarımda solğun bir ay kimi iz buraxıb getdi.

Sən bir zamanlar mənə bənzəyirdin,
indi isə mən sənə bənzəməkdən əl çəkmirəm
qovuşduğumuz gün məni tanıyasan deyə.

Həyat məcburi keçid nöqtəsi,
səbrin sənə qədərki sınaq xətti.
Mübarizədədi ürəyim…..
Hələ çox var gülməyə.

Aysel Nəsirzadə

— https://www.tdksb.org/works/aysel-nesirzade-hele-cox-var-gulmeye