Xuraman Muradova - Türk ruhu
TDKŞB · 03.09.2026

TÜRK RUHU
Xuraman Muradova

Biz ki Altaydan doğan bir nuri-cahan olmuşuq,
Eyni kökdən, eyni qandan əhdi-peyman olmuşuq.
Biz əzəldən var olan bir nəsli-izzət olmuşuq,
Kök salıb tarixə biz, bir şanlı dövlət olmuşuq.

Sarsılmaz təməllərlə həm soyumuz, həm kökümüz,
Aləmin hər dövründə hər dəm əzəl-var olmuşuq.
Qorxu bilməz bir cəsarət, bir şücaət olmuşuq,
Biz yenilməz bir qüvvəylə sarsılmaz can olmuşuq.

Zərbəmizdən titrəyib yer, hökmü-fərman olmuşuq,
Göy üzündə parlayan bir uca ünvan olmuşuq.
Haqqı yaydıq biz cahanda, nuri-rəhmət saçmışıq,
Zülmə qarşı bir səddik, məzluma imkan olmuşuq.

Biz ədalət bayrağın yüksəltmişik hər bir yerdə,
Kimsəsizin qəlbinə hər dəm pənah-can olmuşuq.
Səsləyir Turan bizi, hər bir nəfəsdə min nida,
Ruhu-vəhdət tək gəzib biz, tək bir ünvan olmuşuq.

Türkiyə, həm Azərbaycan — bir amaldır, bir vücud,
Biz bu vəhdət nuru ilə fəxri-dövran olmuşuq.
Vermişik min-min şəhid, torpağı gülşən eylədik,
Qan töküb hər bir qarışda canla qurban olmuşuq.

Mərdü-meydandır bu millət, qeyrəti-vicdanı var,
Saf səmimiyyət yolunda sanki bir can olmuşuq.
Hikmətində mülki-namus hər zaman bir nur alar,
Pak olan şərəf ilə biz fəxri-nişan olmuşuq.

Biz ki eşqi-Xaliq ilə hər dəm olduq birlikdə,
Səcdədə alnı açıq, həm əhli-iman olmuşuq.
Al qanıyla bayrağa həm şölə, həm nəfəs verib,
Dönməyib eşqindən əsla, vətənə qurban olmuşuq.

Zatımız ali-nəcabət, şanlı tarix şahiddir,
Biz cahan mülkündə hər dəm fəxri-insan olmuşuq.
Yaz, Xuraman, yaz, Türkün uca ruhu bitməz, ölməz,
Haqq yolunda birləşib, sarsılmaz insan olmuşuq.

— https://www.tdksb.org/works/xuraman-muradova-turk-ruhu