Xuraman Muradova - BİR GÜN GEDƏRİK

Ömür bir əmanət, dünya bir yalan,

Nə qədər sarılsaq, saxlamaz cahan.

Biz də bir yolçuyuq, ömür bir karvan

Hər şeyi buraxıb bir gün gedərik…

Yarımçıq sözləri qoyub dodaqda,

Bir isti nəfəsi qoyub otaqda,

Bir cüt yaşlı gözlər qalar soraqda

Dönməz bir səfərə bir gün gedərik.

Nə şöhrətlər gedər, nə var, nə sərvət,

Bizdən tək yadigar qalacaq hörmət.

Bir könüldə sevgi, bir dildə rəhmət

Xatirə qoyaraq bir gün gedərik.

Bir şəkil boylanar səssiz divardan,

Bir tanış qoxumuz keçər bahardan,

Adımız çəkilər kövrək dodaqdan

Bir nisgil buraxıb bir gün gedərik.

Xuraman, nə qalar ömürdən, candan?

Bir dua səslənər bəlkə uzaqdan.

Adımız silinsə belə zamandan

Bir könüldə qalıb bir gün gedərik…