Özbəkistan Respublikasının müstəqilliyinin 35-ci ildönümünü böyük sevinc, dərin ehtiram və səmimi qardaşlıq duyğuları ilə qeyd edir, bu əlamətdar gün münasibətilə dost və qardaş Özbəkistan xalqına ən xoş arzularımı çatdırıram.
Otuz beş illik müstəqillik yolu Özbəkistanın milli dövlətçilik iradəsinin, tarixi-mədəni irsə bağlılığının və davamlı inkişaf əzminin parlaq göstəricisidir. Qədim sivilizasiyaların beşiyi olan bu doğma məkan bu gün öz zəngin tarixindən güc alaraq müasir və qüdrətli dövlət kimi beynəlxalq aləmdə layiqli mövqeyini daha da möhkəmləndirir.
Səmərqəndin əzəmətində, Buxaranın mənəvi zənginliyində, Xivənin qədimliyində, Daşkəndin müasirliyində, Fərqanənin bərəkətli torpaqlarında Özbəkistanın böyük tarixinin və zəngin milli-mədəni irsinin izləri yaşayır. Əmir Teymurun dövlətçilik ənənələrindən Əl-Buxarinin mənəvi irsinə, Mirzə Uluqbəyin elm dünyasından Əlişir Nəvainin söz sənətinə qədər uzanan bu möhtəşəm irs yalnız özbək xalqının deyil, bütün Türk və İslam dünyasının ortaq mənəvi sərvətidir.
Azərbaycan ilə Özbəkistanı birləşdirən münasibətlər də məhz bu ortaq tarixi yaddaş, milli-mənəvi dəyərlər və qardaşlıq duyğuları üzərində yüksəlir. Bu gün ölkələrimiz arasında siyasi, iqtisadi, humanitar və mədəni sahələrdə inkişaf edən münasibətlər xalqlarımızın bir-birinə olan dərin rəğbətinin və qarşılıqlı etimadının aydın təzahürüdür. Azərbaycan–Özbəkistan qardaşlığı eyni zamanda Türk dünyasının həmrəyliyinə və birliyinə mühüm töhfə verən strateji mənəvi körpüdür.
Əminəm ki, Azərbaycan və Özbəkistan xalqlarının sarsılmaz dostluğu və qardaşlığı bundan sonra da möhkəmlənəcək, dövlətlərimiz arasındakı çoxşaxəli əməkdaşlıq yeni məzmun və daha böyük miqyas qazanacaqdır.
Bu əlamətdar gündə qardaş Özbəkistana möhkəm dövlətçilik, davamlı tərəqqi, xalqına rifah və firavanlıq, hər bir özbək ailəsinə əmin-amanlıq və xoşbəxtlik arzulayıram.
Müstəqilliyinin 35-ci ildönümü mübarək olsun, əziz Özbəkistan!