Damcı-damcı ürəyimə sızırsan,
Bu şoranlıq çəmən olur, get-gedə,
Kəpənəklər uçuşurlar içində,
Dallarına bülbül qonur, get-gedə.

Hey ağlıma şeir gəlir, söz gəlir,
Gələn sözlə alov gəlir, köz gəlir,
Hər baxışın, hər gülüşün öz gəlir,
Hər tərəfim səninlə dolur, get-gedə.

Əllərində bir duyğu var, nəfəs var,
Yaşamaq var, həyəcan var, həvəs var,
Necə deyim, inanılmaz bir hiss var,
Həmin hissə ruh vurulur, get-gedə.

Nə olacaq belə halım bilmirəm,
Haray çəkim, sakit qalım bilmirəm,
Qadasını necə alım bilmirəm,
Dil susduqca can qovrulur, get-gedə.

Şərifə Cəfəri