Көк Байрақ
Көк бөрілі заманның,
Көзіндей едің – Көк Байрақ!
Шұбырынды көрген даламның,
Өзіндей едің – Көк Байрақ!
Егілген шерлі күйімді
Домбырам айтар күмбірлеп.
Ақ жаулығындай анамның,
Желбіреп едің – Көк Байрақ!
Қазақ деген жұртымның
Жүрегісің – Көк Байрақ!
Алашымның арманы,
Тілегісің – Көк Байрақ!
Аманатын арқалап
бабалардың - Көк Байрақ!
Кеше,бүгін, ертеңнің
Тірегісің – Көк Байрақ!
Тарихымды тербеткен
ғасырлардан – Көк Байрақ!
Болашаққа бағдарсың,
Асыл арман – Көк Байрақ!
Туған жердің тұнығындай
Мөлдір едің – Көк Байрақ!
Азаттықтың туы боп
Желбіредің – Көк Байрақ!
«Менің елім!» дегізген
Мұратымсың – Көк Байрақ!
Оятатын намысты
Сұрапылсың – Көк Байрақ!
Ұшқан құстың қанатына
Арманымды жазайын.
Шабыт-кие шарықтап,
Жыр ағылсын – Көк Байрақ!
Әсел Оспан